QUEIXOS HOXE PARTICIPOU NUNHAS XORNADAS SOBRE MARCA E ETIQUETAXE EN LINGUA GALEGA

A cooperativa lalinense Hoxe defendeu a etiquetaxe en galego como marca de orixe, identidade e calidade.

 A cooperativa de queixos Hoxe participou no día de hoxe nunhas xornadas organizadas polo Consello da Cultura Galega baixo o título “Etiqueta na túa lingua, camiña polo mundo con identidade”.

Na xornada analizouse a presenza actual da lingua galega e outras linguas minoritarias no campo do comercio e da industria, dende dous ámbitos: a súa presenza cuantitativa e cualitativa neste ámbito económico e social, e as súas posibilidades e potencialidades como valor de marca e como xeradora do valor engadido dos produtos nos novos contextos económicos.

Marca e etiquetaxe en lingua galega

As empresas galegas nos últimos anos incrementaron notablemente os seus investimentos en márketing. Apostan en mercados locais e internacionais cada vez máis competitivos o que supón investir en valor engadido para os produtos e, non cabe dúbida, de que a etiquetaxe dos produtos é un elemento fundamental nas estratexias de creación e posta en valor das marcas.

Con tal fin, participaron nesta xornada diferentes expertos do ámbito académico, así como representantes de diversas empresas que destacaron, en diferentes sectores, o uso da lingua galega nas súas accións para a clientela. O obxectivo foi dar a coñecer o impacto, as posibilidades, as dificultades e os desafíos do uso da lingua de Galicia no ámbito comercial, de interese tanto para os investigadores deste ámbito como para os profesionais e estudantes do sector empresarial e da comunicación corporativa.

“Marca e etiquetaxe en lingua galega”

Lito Andión, en nome de Queixos Hoxe, participou na mesa redonda titulada “Marca e etiquetaxe en lingua galega” a cal estivo moderada polo economista e escritor galego Enrique Sáez Ponche, presidente da Fundación Juana de Veiga. Tamén estiveron representantes doutras empresas como Patricia Sánchez Lorenzo de Leite Noso, Adriana Freire de Dinahosting e Francisco Kike Piñeiro da Horta do Obradoiro.

O xerente de Hoxe destacou que “para nós usar o galego nas nosas etiquetas e marcas (HOXE, NENO, DEZA, NAI, A QUEIXEIRA) ten un significado de orixe, de autenticidade do noso. O consumidor identifica os produtos galegos, como produtos de calidade, vinculados á nosa contorna natural e que xera con iso unha economía socialmente sustentable. Consideramos que o consumidor é consciente de que está a comprar un produto de proximidade e que está a axudar ao mantemento da economía galega”; e continuou afirmado que “desde a nosa experiencia sabemos que o consumidor é responsable e consecuente coa defensa dos intereses dos galegos”.

Andión concluíu a súa intervención insistindo na necesidade de apoiar as moitas marcas que se identifican coa nosa lingua e cultura e felicitou ao Consello da Cultura Galega por promover iniciativas como esta.